Японы тоглоомын салбарын тэргүүлэгчдийн нэг Sega компани бизнес стратегидаа томоохон өөрчлөлт оруулж байгаагаа зарлалаа. Тус компани хамгийн сүүлийн санхүүгийн тайландаа “Super game” хэмээх өргөн хүрээний санаачилгаа албан ёсоор зогсоож байгаагаа баталсан байна.
“Super game” төслийг анх 2021 онд Sega-ийн олон жилийн туршлага болон технологийн ололтыг нэгтгэсэн, хэд хэдэн AAA зэрэглэлийн (өндөр төсөвтэй, чанартай) тоглоом бүтээх амбицтай төлөвлөгөө болгон танилцуулж байсан юм. Тухайн үед тус компани энэ чиглэлд 882 сая ам.долларын хөрөнгө оруулалт хийхээр төлөвлөж, “тоглоомын салбарын хил хязгаарыг давсан” бүтээл гаргахаа амлаж байв. Хэдийгээр одоо энэ төслөөсөө татгалзаж байгаа ч яг хэдэн доллар зарцуулсан талаарх мэдээллээ нууцалж байна.
Түүнчлэн Sega үнэгүй тоглоомын (free-to-play) загварт хандах хандлагаа эрс өөрчилжээ. Өмнө нь тус компани үнэгүй тоглоомын загвар нь алдартай цувралууддаа шинэ хэрэглэгчдийг татахад тусална гэж найдаж байсан ч Sonic Rumble Party болон бусад ижил төстэй бүтээлүүдийн үр дүн хүлээлтээс хамаагүй сул байсан юм. Иймд Sega энэ чиглэлээс аажмаар татгалзахаар шийджээ. Тус төслүүд дээр ажиллаж байсан 100 гаруй ажилтныг хэдийнэ бусад багууд руу шилжүүлсэн байна.
Үүний зэрэгцээ 2023 онд зарласан “Шинэ эрин” хөтөлбөр үргэлжлэн хөгжих бөгөөд үүний хүрээнд Sega өөрийн сонгодог франчайзууд болох Jet Set Radio, Streets of Rage, Shinobi, Golden Axe болон Crazy Taxi зэргийг шинэчлэн эргүүлэн авчрахаар төлөвлөж байгаа аж. Харин эдгээр тоглоомын талаарх нарийн мэдээлэл хараахан гараагүй байна.
Мөн саяхан анхны тизерээ цацсан Alien: Isolation аймшгийн тоглоомын үргэлжлэлийн талаар компани одоогоор дэлгэрэнгүй мэдээлэл өгөхөд бэлэн бус байгаагаа дурджээ.
