Bethesda-ийн сансрын туульс болох “Starfield” бараг гурван жилийн дараа АНУ-ын борлуулалтын чартын оргилд дахин заларлаа. Хамгийн сүүлд 2023 оны 9 дүгээр сард буюу анх нээлтээ хийхдээ л ийм амжилт үзүүлж байсан тус тоглоомын энэхүү гэнэтийн “сэргэлт” нь PlayStation 5 консол дээр албан ёсоор гарсантай шууд холбоотой юм. Зах зээлийн шинжээч Мет Пискателлагийн тэмдэглэснээр, PS5 хувилбар худалдаанд гарсан эхний долоо хоногтоо 140 мянга орчим хувь борлогдсон нь чартыг тэргүүлэх гол хөшүүрэг болжээ.
PlayStation 5-ын тоглогчид тоглоомыг анхны хувилбараар нь биш, харин сүүлийн жилүүдэд гарсан “Free Lanes” болон “Terran Armada” зэрэг томоохон шинэчлэлтүүдтэйгээр хүлээн авсан нь давуу тал болсон юм. Гэвч Bethesda-ийн тоглоомуудын “уламжлалт” асуудал болох техник саатал, баг (bugs) шинэ платформ дээр ч тохиолдож, зарим тоглогчид тоглоомоо буцаахад хүрсэн байна. Хөгжүүлэгчид эдгээр алдааг засахаар яаралтай нөхөөсүүдийг (hotfixes) ар араас нь гаргасаар байгаа аж.
Хэдийгээр чартыг тэргүүлсэн нь сайн мэдээ боловч шинжээчид үүнд хэт ач холбогдол өгөхөөс сэрэмжлүүлж байна. “Alinea Analytics”-ийн Рий Еллиоттын үзэж буйгаар 140 мянган хувь борлогдсон нь “даруухан” үзүүлэлт бөгөөд асар их төсөв, 10 жилийн хөгжүүлэлтийн хугацааг тооцвол тоглоом зардлаа арай ядан нөхөж байгаа бололтой. Гэхдээ Starfield-ийн аялал үүгээр дуусахгүй. Тайванийн насны зэрэглэлийн сайт дээр “Switch 2” консолд зориулсан хувилбарын мэдээлэл цацагдсан нь тус тоглоом Nintendo-ийн дараагийн үеийн төхөөрөмж дээр гарч, борлуулалтаа дахин нэг удаа өсгөх магадлалтайг харуулж байна.
