“Sony” компани өөрийн дижитал дэлгүүр болох “PlayStation Store”-т жил бүр уламжлал болгон зохион байгуулдаг “Хар Баасан гараг” (Black Friday) хямдралт худалдааг албан ёсоор эхлүүллээ. 2026 оны 11 дүгээр сарын 30-ныг хүртэл үргэлжлэх энэхүү урамшууллын хүрээнд PS5, PS4 болон PS VR2-т зориулсан тоглоомууд, тэдгээрийн нэмэлт өргөтгөл, DLC-үүдэд 75 хүртэлх хувийн хөнгөлөлт үзүүлж байна.
Олон алдартай томоохон бүтээлүүдийн стандарт суурь хувилбарууд хямдралд хамрагдаагүй ч тэдгээрийн өргөтгөсөн тусгай хувилбарууд нь хямдарсан үнээр санал болгогдож байна. Тухайлбал, “Marvel’s Wolverine” (Digital Deluxe Edition), “The Blood of Dawnwalker” (Eclipse Edition) болон “UFC 6” (Ultimate Edition) зэрэг тоглоомууд хямдарчээ.
Түүнчлэн хямдралын жагсаалтад “Saros” болон “007 First Light” тоглоомуудын өргөтгөсөн хувилбарууд багтсан бол “Silent Hill: Townfall”, “NBA 2K27”, “Astro Bot”, “Beast of Reincarnation” зэрэг бүтээлүүдийн стандарт хувилбарууд хямдралтай үнээр худалдаалагдаж байна.
Санал болгож буй тоглоомуудын нэр төрөл 11 дүгээр сарын 16-нд шинэчлэгдэх хуваарьтай аж. Зарим хямдралууд зөвхөн 11 дүгээр сарын 20 хүртэл хүчинтэй байх бөгөөд үүний дараа шинэ санал, хөнгөлөлтүүдээр солигдох юм. Мөн хэрэглэгчийн бүртгэлийн бүс нутгаас (region) шалтгаалан санал болгож буй тоглоомын жагсаалт болон хямдралын хувь хэмжээ өөр байх боломжтойг сануулжээ.
2 comments
Энэ үеэр л тоглоом цуглуулж авахгүй бол хэзээ авах вэ дээ. Сайхан боломж шүү.
75 хувь гэдэг чинь бас л том хямдрал шүү