Астана хотноо үргэлжилж буй CS2-ын PGL Astana 2026 тэмцээний дөрөв дэх өдрийн эхний тоглолтууд явагдаж дууслаа.
Плей-оффын эрхийн төлөөх 2:1 амжилттай багуудын хэсэгт MOUZ болон Aurora багууд тулгарлаа. Хоёр мапны турш багууд тун тэнцүүхэн, сонирхолтой тоглолтыг үзүүлэв. Эхний мап болох Dust2-ыг Aurora баг сонгосон ч 11:13 харьцаатайгаар ялагдал хүлээсэн юм. Гэсэн хэдий ч тус мапны шилдэг тоглогчоор Aurora-гийн ахлагч Энгин “MAJ3R” Кюпели 1.39 үзүүлэлттэйгээр тодорлоо.
Хоёр дахь мап Nuke дээр үндсэн цагт багууд ижил оноо авч (7:5 ба 5:7), тоглолт нэмэлт цаг руу шилжсэн юм. Нэмэлт үед MOUZ баг илүү байж, 7:3-аар оноо авснаар 19:15-аар ялалт байгууллаа. Ингэснээр MOUZ баг цувралыг 2:0-ээр дуусган плей-оффын шатанд шалгарч, харин Aurora баг 2:2 хэсэг рүү унаж байна.
Харин 1:2 амжилттай багуудын хэсэгт magic болон HEROIC багууд тэмцээнд үлдэхийн төлөө өрсөлдөж, magic баг 2:1 харьцаатайгаар ялалт байгууллаа. Цуврал Mirage мап дээр magic-ийн ялалтаар (13:8) эхэлсэн ч HEROIC баг өөрсдийн сонголт Dust2 дээр 13:4-өөр илт давуу хариу барьсан юм. Шийдвэрлэх Inferno мап дээр magic баг тоглолтыг бүрэн хянаж, 13:6-аар өрсөлдөгчөө буулган авснаар HEROIC-ийг тэмцээнээс хаслаа.
PGL Astana 2026 тэмцээн 5 дугаар сарын 9-нөөс 17-ны хооронд Казахстаны нийслэл Астана хотын “Barys Arena”-д зохион байгуулагдаж байна. Тус тэмцээнд 16 баг нийт 1,600,000 ам.долларын шагналын сангийн төлөө өрсөлдөж байгаа бөгөөд үүний 800,000 долларыг тоглогчдод, үлдсэн 800,000 долларыг клубүүдэд олгох юм.
