“IEM Cologne Major 2026” тэмцээн түүхэн үйл явдлаар дүүрэн өрнөж байгаа ч энэ нь Хойд Америк (NA) бүс нутгийн хувьд баярлахаар зүйл биш байлаа. Мэйжор формат үүссэн цагаас хойш анх удаа тус бүс нутгийн нэг ч тоглогч тэмцээний шилдэг 16-д багтаж чадсангүй.
Тус тэмцээнд Хойд Америкийн тоглогчидтой гурван баг оролцсон нь M80, Liquid болон NRG байв. Үүнээс хоёр баг нь эхний шатандаа (Stage 1) хасагдсан юм. Хойд Америкийн сүүлчийн найдвар болоод байсан M80 баг хоёрдугаар шатанд (Stage 2) шалгарсан ч, улмаар 1-3 гэсэн амжилтаар тэмцээнээ өндөрлүүлж, ТОП-16-гийн гадна хоцорлоо.
Найман жилийн өмнөх оргил үе ба өнөөдрийн уналт
Энэхүү уналт нь тэдний ердөө найман жилийн өмнөх оргил үетэй харьцуулахад дэндүү харамсалтай харагдаж байна. 2018 онд “Cloud9” баг “ELEAGUE Major Boston” тэмцээнд түрүүлж байсан бөгөөд энэ нь Хойд Америкийн байгууллага Мэйжорын цомыг өргөсөн цорын ганц тохиолдол байв.
Тухайн үеийн бүрэлдэхүүнд Stewie2k, autimatic, tarik зэрэг Хойд Америкийн Counter-Strike-ын бүхэл бүтэн эрин үеийг тодорхойлж, дэлхийн шилдэгүүдтэй эн тэнцүү өрсөлддөг байсан домогт тоглогчид багтаж байлаа. Харан өнөөдөр тус бүс нутгийн нэг ч тоглогч энэхүү хамгийн нэр хүндтэй тэмцээний шилдэг 16-д нэрээ бичүүлж чадсангүй.
Системийн хямрал
Энэхүү уналт нь гэнэтийн зүйл биш, харин алгуурхнаар явсаар ирсэн үйл явц байв. Хойд Америкчууд арван жил хүрэхгүй хугацааны дотор Мэйжорын аваргаас плей-оффын шатанд ч харагдахаа болих хүртлээ доройтсон юм.
Үүнд дараах шалтгаанууд нөлөөлжээ:
- Бүс нутгийн дотоодын лигүүдийн тоо цөөрсөн;
- Авьяаслаг тоглогчид бусад тоглоом руу шилжсэн (авьяас чадварын урсгал);
- Тир-1 (tier-1) түвшний дэд бүтэц хязгаарлагдмал болсон.
Эдгээр системийн шинжтэй гол асуудлуудыг цаг тухайд нь шийдэж чадаагүйн бодит үр дагавар нь өнөөдрийн “Cologne 2026” тэмцээн болж байна.
