CS2-ийн FISSURE Playground 3 тэмцээн байршлаа өөрчилж, Хятадын Сүжоу хотод зохион байгуулагдахаар боллоо. Өмнө нь FISSURE Playground 5 нэрээр танигдаж байсан уг тэмцээн 9-р сарын 8-13-ны хооронд болох бөгөөд нийт 1 250 000 ам.долларын шагналын сантай, 16 баг оролцох юм.
Шэньжэнээс Сүжоу руу шилжив
Тэмцээнийг анх Шэньжэнь хотод зохион байгуулахаар төлөвлөж байсан ч шинэ шийдвэрийн дагуу SND Cultural and Sports Centre хүлээн авна. Байршлын өөрчлөлтийн шалтгааны талаар дэлгэрэнгүй мэдээлэл дурдаагүй байна.
FISSURE Playground 3 нь FISSURE болон Шанхайн медиа компани GGMEDIA-ийн урт хугацааны стратегийн хамтын ажиллагааны хүрээнд болох анхны арга хэмжээ болно. GGMEDIA өмнө нь BLAST Open Porto 2026 тэмцээний Азийн шалгаруулалтыг зохион байгуулж байсан юм.
Хятадад Tier-1 түвшний тэмцээнүүд хийхээр төлөвлөж байна
Зохион байгуулагчдын мэдэгдсэнээр, хоёр компани цаашид Хятадад жил бүр Tier-1 түвшний тэмцээн зохион байгуулахаар төлөвлөж байна. Энэ нь бүс нутгийн CS2 сценийг олон улсын томоохон тэмцээнүүдтэй илүү ойртуулах зорилготой гэж үзэж болно.
Үүний зэрэгцээ FISSURE өмнө нь өөрийн тэмцээнүүдэд оролцсон клубүүдэд санхүүгийн өртэй гэх мэдээлэл гарч байсан. Гэсэн ч одоогоор FISSURE Playground 3 тэмцээн шинэ байршил, шинэ түншлэлийн хүрээнд товлосон хугацаандаа болохоор байна.
