Казахстан улсын нийслэл Астана хот 2027 оны Олон улсын цахим спортын холбоо (IESF)-ны Дэлхийн аварга шалгаруулах тэмцээнийг (WEC27) албан ёсоор зохион байгуулахаар боллоо. Өнөөдөр талууд хамтын ажиллагааны гэрээнд гарын үсэг зурснаар Астана хот ирэх жил дэлхийн өнцөг булан бүрээс ирэх тамирчид, баг хамт олон болон хөгжөөн дэмжигчдийг нэгтгэсэн цахим спортын гол төв цэг болох нь баталгаажлаа.
Гэрээ үзэглэсэн талууд ба ач холбогдол
Түүхэн гэрээг баталгаажуулах ёслолын ажиллагаа Казахстан улсын шинэ Их сургуулийн кампусын нээлтийн үеэр болсон нь бэлгэдэлтэй үйл явдал болов. Энэ нь тус тэмцээн зөвхөн тоглоом биш, харин боловсрол, өндөр технологи болон залуу үеийн хөгжилтэй салшгүй холбоотойг илтгэж байна. Уг арга хэмжээ нь Казахстаны залуучуудыг дэмжих, олон улсын хамтын ажиллагааг өргөжүүлэх урт хугацааны стратегийн чухал хэсэг аж.
Энэхүү томоохон хэмжээний спортын баярыг зохион байгуулах гэрээнд дараах талууд гарын үсэг зуржээ:
- Олон улсын цахим спортын холбоо (IESF);
- Казахстан улсын Аялал жуулчлал, спортын яам;
- Казахстаны Цахим спортын холбоо.
Дэлхийн хэмжээний мега эвент
“WEC27” нь үндэсний бахархал, эв нэгдэл, цахим спортын ур чадварыг сурталчлах асар том баяр болох юм. Мянга мянган тамирчдын хувьд өөрийн улсын албан ёсны холбоогоор дамжин, төрийн далбаан дороо дэлхийн тайзнаа өрсөлдөх хамгийн нэр хүндтэй боломж билээ.
Зохион байгуулагчдын мэдээлж буйгаар, тэмцээний урьдчилсан шатанд IESF-ийн гишүүн 150 гаруй орны холбоод оролцох бөгөөд бүх тивийн шилдэгүүд Астанад цугларах аж. Тэмцээн хэд хэдэн үндсэн төрлөөр (дисциплин) явагдах бөгөөд шударга тоглолт, олон ургальч байдал, соёлын солилцоо, олон улсын хамтын ажиллагааны зарчимд тулгуурлах юм.
Тэмцээний нарийн формат, тоглоомын төрлүүд, хуваарь, урьдчилсан шатны бүтэц болон тасалбар борлуулалтын талаарх дэлгэрэнгүй мэдээллийг зохион байгуулагчид ирэх саруудад шат дараатайгаар зарлах ажээ.
