Технологийн аварга “Sony” компани консол тоглоомын ертөнцөд нэгэн томоохон өөрчлөлт хийхээр шийдсэн нь цахим орчныг шуугиулж байна. Тэд 2028 оны нэгдүгээр сараас эхлэн PlayStation консолд зориулан гаргах бүх шинэ тоглоомуудаа зөвхөн дижитал хэлбэрээр худалдаалахаар болжээ. Ингэснээр тоглогчдын цуглуулдаг уламжлалт хайрцагтай, пластмасс дискнүүд түүх болон үлдэхээр болж байна.
Компанийн зүгээс энэхүү алхмаа хэрэглэгчдийн худалдан авалтын дадал хувьсан өөрчлөгдсөнтэй холбон тайлбарлав. Өнөөдөр нийт тоглогчдын даруй 85 хувь нь тоглоомыг дэлгүүрээс бодиор нь худалдаж авахаас татгалзаж, гэрээсээ цахим хэлбэрээр шууд татан авч тоглодог болсон байна. Зах зээлийн энэхүү бодит хандлага нь хатуу диск үйлдвэрлэлийг зогсоох гол шалтгаан болжээ.
Брэндүүдийн хошигнол ба цахим егөөдөл
Дискнээс бүрмөсөн татгалзах тухай мэдээлэл зөвхөн геймерүүдийн дунд маргаан дагуулаад зогсохгүй, дэлхийн алдартай компаниудын даажигналын гол сэдэв болов. Тэд Sony-ийн шийдвэрийг ирониктэйгээр дуурайн, өөрсдийн цахим хуудаснаа хөгжилтэй мэдэгдлүүд гаргаж эхэлжээ.
Хамгийн онцлох егөөдлүүдээс дурдвал:
- KFC болон Domino’s: Түргэн хоолны алдартай сүлжээнүүд хамтран “албан ёсны мэдэгдэл” гаргаж, 2028 оноос эхлэн бодит хоол хүнснээс татгалзаж, үйлчлүүлэгчдэдээ зөвхөн “цахим” пицца болон шарсан тахиа санал болгохоо хошигнов.
- Esports Awards: Цахим спортын салбарын хамт олон ч үүнээс хоцорсонгүй. Тэд 2028 оноос эхлэн тэмцээний ялагчдад ямар нэгэн бодит цөм, медаль гардуулахгүй бөгөөд оронд нь зөвхөн JPEG эсвэл PNG форматтай зураг шагнал болгож өгнө гэв.
Энэхүү шийдвэр нь ирээдүйд бусад консол үйлдвэрлэгчдийг ч мөн дискнээс татгалзахад хүргэж магадгүй гэж шинжээчид таамаглаж байна.
