“BLAST”-ийн гүйцэтгэх продюсер Себастьян “Kuno” Гридхольт стример Морис “KheZu” Гутманнтай ярилцахдаа кибер спортын тэмцээн, ялангуяа Dota 2-ын арга хэмжээг зохион байгуулах нь хэр өндөр зардалтай бөгөөд төвөгтэй байдаг талаар хуваалцлаа.
Гридхольтын хэлснээр, олон улсын томоохон тэмцээнүүдийн нийт өртөг “хэдэн сая” долларт хүрдэг байна. Хэдийгээр шагналын сан нь 1 сая доллар байлаа ч, түүнийг зохион байгуулах зардал нь түүнээс хамаагүй өндөр байдаг аж. Үүнд замын зардал, байр түрээс, техник хэрэгсэл болон боловсон хүчний зардал зэрэг багтдаг байна.
Бэлтгэл ажлын хувьд, жижиг хэмжээний студийн тэмцээнийг бэлтгэхэд хоёр сарын шаргуу хөдөлмөр шаардагддаг бол том цэнгэлдэх хүрээлэнд болох тэмцээнд гурваас дөрвөн сар, магадгүй түүнээс ч их хугацаа зарцуулдаг байна. Шууд дамжуулалтын ард 20-оос 30 хүнтэй томоохон баг ажилладаг ажээ.
“BLAST Slam” цувралыг холимог формат руу шилжүүлж, зөвхөн шийдвэрлэх хэсгийг LAN (локаль сүлжээгээр тоглох) хэлбэрээр явуулсан нь зардлыг ихээхэн хэмнэсэн байна. Урьд нь Сингапур болон Хятадын Ченду хотод болсон тэмцээнүүд ложистикийн зардал ямар өндөр байдгийг харуулсан юм.
Гэсэн хэдий ч нэмэлт зардлууд гарсаар байдаг. Тэмцээн удаан үргэлжлэх тусам тоглолтын тоо нэмэгдэж, энэ нь дамжуулалтын цаг, тайлбарлагч болон ажиглагч нарын (observer) хэрэгцээг ихэсгэдэг. BLAST нь өндөр чанартай продакшнд анхаардаг тул үйлдвэрлэлийн зардал нь ч дагаад өсдөг байна.
Гридхольт мөн BLAST-ийн арилжааны хэлтсийн талаар дурдлаа. Тэдний гол үүрэг нь спонсор болон түншлэлийн харилцааг хангах явдал юм. Тэд брэндүүд, хотууд болон бусад түншүүдэд хандаж, харилцан ашигтай хамтын ажиллагааг санал болгодог. Үүнд нийт үзэгчдийн тоо, давхцаагүй (unique) үзэгчдийн тоо болон үзэлтийн дундаж хугацаа зэрэг өгөгдлүүд маш чухал үүрэг гүйцэтгэдэг байна. Эдгээр тоо баримт нь спонсоруудад өөрсдийн хөрөнгө оруулалтын үнэ цэнийг харахад тусалдаг аж.
Тэрээр Dota 2 тоглоомын үзэгчид бусад тоглоомын фэнүүдтэй харьцуулахад илүү удаан хугацаанд тогтвортой үздэг нь спонсоруудын сонирхлыг татах гол хүчин зүйл болдог гэдгийг онцлов.
Одоогийн байдлаар BLAST нэг ерөнхий спонсортой байхаас татгалзаж, салбар бүрийн онцлогт тохирсон олон спонсортой хамтран ажиллах стратегийг баримталж байна.
