Blizzard компани энэ онд “World of Warcraft” тоглоомдоо “Roofus Pack” сайн үйлсийн аян эхлүүлж, тоглогчдод ажилсаг, барилгачин нохой болох Руфусыг шинэ ханиараа худалдан авахыг санал болгосон билээ. Тоглоомын орчин үеийн хувилбар болон “WoW Classic”-д тэрээр тоглоом доторх тэжээвэр амьтан болсон бөгөөд багцыг худалдан авснаар тоглогчид өөрсдийн орон сууцыг тохижуулах сэдэвчилсэн иж бүрдлийг дагалдуулан авсан юм.
Орон сууцны санд зориулсан хандивын аян
Аяны хүрээнд Blizzard “Roofus Pack” багцын худалдан авалт бүрийн орлогын 100 хувийг хүмүүсийг хүртээмжтэй, аюулгүй орон сууцаар хангах чиглэлээр ажилладаг “Habitat for Humanity” байгууллагад шилжүүлжээ.
Тоглогчдын дэмжлэгийн ачаар энэхүү аян 1.3 сая гаруй ам.доллар цуглуулж чадсан байна. Blizzard компани Руфусыг худалдан авсан, аяны талаарх мэдээллийг түгээсэн болон олон нийтийн анхаарлыг татахад тусалсан бүх хүмүүст талархал сэтгэгдлээ илэрхийллээ.
Багцын агуулга ба биечлэн оролцсон сайн үйлс
Уг багцад “World of Warcraft”-ын орчин үеийн болон “WoW Classic”-ын шинэчлэгдсэн хувилбаруудад ашиглах боломжтой “Roofus Companion Pet” багтсан байв. Түүнчлэн тоглогчид тоглоом доторх орон сууцандаа зориулсан “Paw Pal” иж бүрдлийг хүлээн авсан бөгөөд үүнд дөрвөн төрлийн дээвэртэй, өөрчлөх боломжтой нохойн овоохой, хоёр төрлийн хэвтэр болон усны сав багтжээ.
Санхүүгийн дэмжлэгээс гадна Blizzard болон “World of Warcraft” багийн ажилтнууд Калифорниа мужийн Алтадена хотод “Habitat for Humanity”-ийн ажилд биечлэн нэгдэж, түймэрт өртсөн гэр бүлүүдэд орон сууц барихад тусалсан байна.
“Habitat for Humanity” нь дэлхийн олон оронд үйл ажиллагаа явуулдаг бөгөөд хүмүүст аюулгүй, хүртээмжтэй орон сууцтай болоход нь тусалдаг. Үүсгэн байгуулагдсан цагаасаа хойш тус байгууллага 65 сая гаруй хүнд орон сууцтай болох замаар өөрсдийн ирээдүйг бүтээхэд нь туслаад байна.
