Мэргэжлийн “Dota 2”-ын ертөнцөд томоохон дуулиан тарьсан мөрдөн байцаалт дуусаж, Кибер спортын шударга байдлын комисс (ESIC) Томми “Taiga” Ле-г насан туршдаа тэмцээнд оролцох эрхийг нь хасах шийдвэр гаргалаа. Олон сар үргэлжилсэн шалгалтын үр дүнд түүнийг тоглолтын үр дүнд нөлөөлөх, хууль бус бооцоо тавих зэрэг ёс зүйн хэд хэдэн ноцтой зөрчил гаргасан гэж үзжээ.
Ноцтой зөрчлүүд ба мөрдөн байцаалтын үр дүн
ESIC-ийн тогтоосноор Taiga нь бооцоо тавигчид болон тоглолтын үр дүнд нөлөөлдөг сэжиг бүхий бүлгэмүүдтэй шууд харилцаж, санхүүгийн ашиг сонирхлын үүднээс тэдэнтэй хамтран ажилладаг байсан байна. Тэрээр багийнхаа дотоод инсайдер мэдээллийг задруулахаас гадна тоглолтын явцад тодорхой үйл явдлууд (жишээ нь, “spot-fixing” буюу тодорхой эвентүүдийг санаатайгаар гүйцэтгэх) болохыг урьдчилан тохиролцож, үүнээсээ санхүүгийн ашиг олдог байсан нь баримтаар батлагдсан юм.
Шийдвэрт нөлөөлсөн хамгийн гол хүчин зүйл нь Taiga мөрдөн байцаалтын явцад комисстой хамтран ажиллахаас бүрэн татгалзсан явдал байлаа. Тэрээр өөрт нь ирсэн хууль бус саналуудын талаар хэнд ч мэдэгдээгүй төдийгүй, асуултуудад хариулахаас зайлсхийсэн нь “эрхээ хасуулах” хамгийн хүнд нөхцөлийг бүрдүүлжээ.
Мэргэжлийн карьерын “GG”
Энэхүү шийдвэр гарснаар түүнд ESIC-ийн гишүүн байгууллагуудын зохион байгуулж буй (PGL, ESL, DreamHack гэх мэт) бүх тэмцээнд оролцохыг бүрмөсөн хориглож байна. Өмнө нь дэлхийн шилдэг баг болох OG-д тоглож, олон мянган шүтэн бишрэгчтэй байсан түүний замнал ийнхүү кибер спортын түүхэн дэх хамгийн хатуу шийтгэлээр өндөрлөлөө. Энэхүү шийдвэр нь бусад тоглогчдод “шударга бус тоглолт ямар ч ирээдүйгүй” гэдгийг харуулсан том сануулга болж байна.
