CD PROJEKT RED “The Witcher 3: Wild Hunt Remastered”-ийг албан ёсоор танилцууллаа. Домогт RPG тоглоомын шинэчилсэн хувилбар 2026 оны 9-р сарын 29-нд гарах бөгөөд студи мөн 2027 онд худалдаанд гарах шинэ төлбөртэй нэмэлт болох “Songs of the Past”-ийн анхны трейлерийг үзүүлжээ.
Gamescom Opening Night Live ёслолын үеэр хөгжүүлэгчид “The Witcher 3”-т хийгдэх томоохон сайжруулалтуудыг танилцуулсан байна. Remastered хувилбар нь анхны тоглоомыг эзэмшдэг хэрэглэгчдэд тохирох платформ дээр үнэ төлбөргүй шинэчлэлт хэлбэрээр очих бөгөөд график, гүйцэтгэл, тоглоомын механикийг сайжруулах юм.
Шинэчилсэн тулаан, хөдөлгөөн, ур чадварын систем нэмэгдэнэ
Remastered хувилбарт тулааны систем шинэчлэгдэж, ертөнцөөр аялах болон хөдөлгөөний механик сайжрах аж. Мөн witcher signs буюу Геральтын шидийн тэмдгүүдийн эффект шинэчлэгдэж, морь удирдлага илүү боловсронгуй болно.
Үүнээс гадна мангасуудын зан авирыг сайжруулж, ур чадварын модыг дахин боловсруулж, transmog систем, өргөтгөсөн photo mode, шинэ төгсгөх цохилтууд болон олон өөрчлөлт нэмэхээр төлөвлөжээ.
“The Witcher 3: Wild Hunt Remastered” PC, PlayStation 5, Xbox Series X|S дээр гарна. Мөн тоглоом анх удаа Nintendo Switch 2-т зориулсан native хувилбартай болох юм. Урьдчилсан захиалга аль хэдийн нээгдсэн байна.
CD PROJEKT RED мөн “Songs of the Past” нэмэлтийн талаар дэлгэрэнгүй мэдээлэл өглөө. Шинэ DLC-ийн үйл явдал Геральтыг Леттен нэртэй шинэ бүс нутаг руу аваачна. Энэ нь эртний тосгоны уламжлал, ардын аман зохиол, элбэг ургац, томоохон баяр наадамтай үзэсгэлэнт газар боловч нутгийнхны тайван амьдралын цаана харанхуй нууц нуугдаж байдаг аж.
Геральт өмнө нь таарч байгаагүй дайснуудтай нүүр тулж, олон жилийн турш нуугдсан муу ёрын хүчний эсрэг тэмцэх болно. “Songs of the Past” төлбөртэй нэмэлт байх бөгөөд 2027 онд PC, PlayStation 5, Xbox Series X|S болон Nintendo Switch 2 дээр гарна. Зарим платформ дээр үүнийг wishlist-д нэмэх боломжтой болжээ.
Hearts of Stone, Blood and Wine бүх эзэмшигчдэд үнэгүй болно
CD PROJEKT RED-ийн зарласан өөр нэг чухал мэдээ нь “The Witcher 3”-ийн бүх эзэмшигчид өнөөдрөөс эхлэн тоглоомын хоёр алдартай нэмэлт болох “Hearts of Stone” болон “Blood and Wine”-ийг үнэгүй авах боломжтой болсон явдал юм. Ингэснээр тоглогчид 9-р сард Remastered хувилбар гарахаас өмнө эдгээр DLC-г дахин эсвэл анх удаа тоглох боломжтой болно.
Мөн CD PROJEKT RED Blizzard Entertainment-тэй хамтран ажиллахаа зарлалаа. “The Witcher 3: Wild Hunt Remastered” болон “Songs of the Past” 9-р сарын 29-нд Battle.net дээр гарна. Blizzard-ийн платформоор нэмэлтийг худалдаж авсан тоглогчид Геральтаас санаа авсан Diablo 4-ийн тусгай skin авах юм. Энэ бонусын талаар илүү дэлгэрэнгүй мэдээллийг 9-р сард болох BlizzCon дээр танилцуулна гэжээ.
“Songs of the Past”-ийг CD PROJEKT RED “The Witcher 3”-ийн хөгжүүлэлтэд оролцож байсан ахмад мэргэжилтнүүдтэй Fool’s Theory студитэй хамтран бүтээж байна. Харин Remastered хувилбар дээр өмнө нь “The Witcher 3”-тай ажиллаж байсан туршлагатай Yigsoft студитэй хамтран ажиллаж байгаа аж.
Gamescom-ийн үеэр үзэсгэлэнд очсон хүмүүс “Songs of the Past” болон Remastered хувилбарын танилцуулгыг 8.1 танхимд үзэх боломжтой. Харин биечлэн очих боломжгүй хүмүүст зориулан CD PROJEKT RED YouTube болон Twitch дээр тусгай REDstreams нэвтрүүлэг хийхээр төлөвлөжээ.
2 comments
Пөөх, Witcher 3-ыг дахин тоглох сайхан шалтгаан гарч ирлээ! Трейлер нь үнэхээр гоё харагдаж байна
CD Projekt Red ч тоглоомчдоо баярлуулж чаддаг шүү