Sony компани “PlayStation Plus” үйлчилгээнийхээ үнийг дахин нэмж байгаагаа зарласан бөгөөд уг шийдвэр тавдугаар сарын 20-ноос хэрэгжиж эхэлнэ. Тус компани энэхүү өөрчлөлтийг “зах зээлийн өнөөгийн нөхцөл байдал”-тай холбон тайлбарлаж байна. Үнийн өсөлт нь ам.доллар, евро болон британи фунт стерлингээр тооцоо хийдэг бүс нутгуудын шинэ хэрэглэгчдэд хамаарах аж.
Энэхүү алхам нь Sony компанийн үнэ нэмэх цуврал арга хэмжээний үргэлжлэл бөгөөд тэд хамгийн сүүлд 2026 оны гуравдугаар сард PS5 консолынхоо үнийг далайцтай нэмсэн билээ.
Тавдугаар сарын сүүлээс эхлэн шинэ хэрэглэгчдэд зориулсан “PS Plus Essential” суурь багцын үнэ сард ойролцоогоор 1 ам.доллароор нэмэгдэнэ. Шинэчлэгдсэн үнэ нь нэг сарын багцад $10.99 / €9.99 / £7.99, харин гурван сарын багцад $27.99 / €27.99 / £21.99 болох юм. Sony компани үнэ нэмэгдэх улс орнуудын нарийн жагсаалтыг гаргаагүй ч ашиглаж буй валютууд нь АНУ, Евро бүс болон Их Британийн зах зээлд шууд нөлөөлөхийг харуулж байна.
Одоогийн идэвхтэй захиалагчид хуучин үнээрээ үйлчилгээгээ үргэлжлүүлэн авах боломжтой ч энэ нь зөвхөн захиалгаа тасралтгүй сунгасан тохиолдолд үйлчилнэ. Хэрэв захиалгын хугацаа дуусах, цуцлагдах, эсвэл хэрэглэгч өөрөө багцаа өөрчлөх шийдвэр гаргавал дараагийн сунгалт шинэ үнийн тарифын дагуу хийгдэх аж.
Гэхдээ энэхүү дүрэмд хоёр онцгой тохиолдол байгаа нь Турк болон Энэтхэгийн тоглогчдод хуучин үнээ хадгалах боломж огт олгогдохгүй. Эдгээр бүс нутгуудад шинэ тариф нь захиалга төлөвлөгөөний дагуу сунгагдах хугацаанаас үл хамааран шууд хүчин төгөлдөр хэрэгжиж эхэлнэ.
