“Grand Theft Auto VI” тоглоомын урьдчилсан захиалга 2026 оны тавдугаар сарын 18-нд эхлэх магадлалтай байна. Энэхүү мэдээлэл нь “Best Buy” сүлжээ дэлгүүрийн түншүүдэд зориулсан мэдээллийн товхимолд дурдагдсанаар олон нийтэд тархжээ.
Тус и-мэйлд дурдсанаар, урьдчилсан захиалгын нээлтэд зориулсан сурталчилгааны аян тавдугаар сарын 18-наас 21-ний хооронд үргэлжлэх аж. Хэдийгээр “Rockstar Games”-ээс албан ёсны баталгаажуулалт ирээгүй байгаа ч энэхүү хугацаа нь хэд хэдэн шалтгааны улмаас логиктой харагдаж байна.
Стратегийн чухал үе шат
Тавдугаар сарын 21-ний өдөр тоглоом хэвлэгч “Take-Two” компани санхүүгийн шинэ тайлангаа танилцуулна. Өмнө нь тус компани томоохон төслүүдийнхээ чухал мэдээллийг тайлан гаргахын өмнөхөн зарлаж, хувьцаа эзэмшигчдийн итгэлийг нэмэгдүүлдэг байсан. Тиймээс урьдчилсан захиалгыг энэ үеэр эхлүүлэх нь маркетингийн том стратегийн нэг хэсэг байх бүрэн боломжтой юм.
Тоглоомын нээлт болон платформууд
GTA VI тоглоом 2026 оны арваннэгдүгээр сарын 19-нд албан ёсоор нээлтээ хийхээр товлогдсон бөгөөд эхний ээлжинд дараах платформууд дээр гарна:
- PlayStation 5
- Xbox Series X/S
Харин ПК хэрэглэгчдийн хувьд арай удаан хүлээх шаардлагатай болох нь. Тоглоомын компьютер дээрх хувилбар 2027 оны эхээр гарахаар төлөвлөгдөж байна.
