128 баг бүртгүүлбэл эхний өдөр маш нягт хуваарьтай болно
Esports World Cup 2026-ийн CS2 төрлийн Last Chance Qualifier буюу LCQ-ийн зохион байгуулагчид шалгаруулалтын төлөвлөгөөгөөрөө киберспортын хүрээнийхний анхаарлыг татлаа. Өмнө нь Open Qualifier гэж нэрлэгдэж байсан энэ шатанд хэрэв дээд хэмжээ болох 128 баг оролцвол эхний өдөр BO1 форматын нийт 160 тоглолт зохион байгуулагдах боломжтой байна.
Энэ тоо хамгийн их хэлэлцүүлэг дагуулж байна. Учир нь бүх 128 баг оролцсон тохиолдолд тэднийг 32 хэсэгт хувааж, хэсэг бүр double-elimination форматаар тоглуулах юм. Ийм бүтэц нь эхний өдөр маш олон богино цуврал нэгэн зэрэг явагдах нөхцөл бүрдүүлжээ.
FACEIT дээр 60 хоногийн бан авах эрсдэлтэй
LCQ-ийн дүрэмд хэд хэдэн анхаарал татах нөхцөл багтсан байна. Бүртгүүлснийхээ дараа тэмцээнээс татгалзсан багууд FACEIT платформ дээр 60 хоногийн блок авах аж.
Мөн тоглолтууд өндөр хүчин чадалтай компьютерууд дээр явагдах боловч мониторын хувьд хамгийн түгээмэл, хурдан TN panel бүхий загваруудыг ашиглахгүй байж магадгүй гэж тэмдэглэжээ.
Үндсэн шатанд шалгарсан багуудын зардлыг зохион байгуулагчид бүрэн хариуцна. Үүнд байр, хоол болон буцах нислэгийн зардал багтах юм. Харин бусад багууд LCQ-д оролцох аялал, бэлтгэлийн бүх зардлаа өөрсдөө төлөх шаардлагатай.
Бүртгүүлсэн багуудын жагсаалт ч ихээхэн өөрчлөгдсөн байна. Өмнө нь 110 баг бүртгэлтэй байсан бол одоогоор 57 баг үлджээ. Гэсэн ч байгууллагуудад Парис руу зорчих тасалбараа авах, бэлтгэлээ дуусгах, тэмцээнд бүртгүүлэхэд дор хаяж арав орчим хоногийн хугацаа үлдсэн байна.
