24 баг хэсгийн шатнаас өрсөлдөөнөө эхлүүлнэ
Esports World Cup 2026-ийн PUBG төрлийн үндсэн тэмцээний формат тодорхой боллоо. Энэ удаагийн ивентэд нийт 24 баг оролцох бөгөөд тэмцээний дүнгээр зөвхөн шилдэг найман баг EWC-ийн клубийн оноо авах юм.
Хэсгийн шатанд 24 багийг гурван тэнцүү хэсэгт хуваана. Хэсэг бүр нийт 12 тоглолт хийх бөгөөд энэ шат 7-р сарын 21-23-ны хооронд үргэлжилнэ.
Хэсгийн шатны хуваарь:
- 7-р сарын 21 — A болон B хэсгийн тоглолтууд
- 7-р сарын 22 — A болон C хэсгийн тоглолтууд
- 7-р сарын 23 — B болон C хэсгийн тоглолтууд
Энэ шатны дараа нийт оноогоороо тэргүүлсэн 16 баг гранд финалд шалгарна. Харин үлдсэн багууд тэмцээнээ дуусгах юм.
Аваргыг match-point системээр тодруулна
Гранд финалд 16 баг өрсөлдөнө. Эхний 12 тоглолтын дараа “match-point” босгыг тогтоох бөгөөд энэ нь тухайн мөчийн тэргүүлэгч багийн оноон дээр 10 оноо нэмсэнтэй тэнцүү байна.
Дараа нь шаардлагатай онооны босгыг давсан багуудын дундаас дараагийн тоглолтуудын нэгийг түрүүлж хожсон баг аваргаар тодорно. Аварга тодорсны дараа бусад байрыг нийт онооны дагуу эрэмбэлэх юм.
Гранд финал нийт 18 тоглолттой бөгөөд 7-р сарын 24-26-ны хооронд гурван өдөр үргэлжилнэ. Ийм формат нь багуудаас зөвхөн тогтвортой оноо цуглуулах бус, шийдвэрлэх мөчид заавал ялалт авах чадварыг шаардах болно.
