3-р сарын 12-нд Америкийн Niantic Labs компани өөрийн тоглоом хөгжүүлэлтийн салбараа Саудын Арабын эзэмшлийн Scopely компанид $3.5 тэрбумаар худалдсан талаар зарлалаа.
Энэхүү шийдвэр нь Niantic-ийн гео-орон зайн технологид төвлөрөх стратегийн шинэчлэлтэй холбоотой бөгөөд 2016 онд Pokémon GO-ийн гайхалтай амжилтыг давтах оролдлого нь бүтэлгүйтсэнтэй шууд хамааралтай юм.
Саудын Арабын тоглоомын салбарын өсөлт
Энэхүү хэлэлцээр нь Саудын Арабын тоглоомын салбарт дэлхийн төв болох төлөвлөгөөний нэг хэсэг бөгөөд тус улсын суверен сангийн харьяа Savvy Games Group дамжуулан Scopely компанийг 2023 онд $4.9 тэрбумаар худалдан авч байсан. Энэ нь тус улсын эдийн засгийн тоглоомын салбарыг хөгжүүлэх 38 тэрбум ам.долларын хөрөнгө оруулалтын бодлогын нэг хэсэг юм.
Niantic шинэ компани байгуулна
Niantic энэ хэлэлцээрийн хүрээнд өөрийн хөрөнгө оруулагчдад $350 сая ам.доллар хуваарилах бөгөөд шинээр Niantic Spatial хэмээх гео-орон зайн хиймэл оюун ухаан (AI) хөгжүүлэх шинэ компани үүсгэн байгуулахаа мэдэгдсэн. Энэхүү компанийн удирдлагыг Niantic-ийн үүсгэн байгуулагч, Гүйцэтгэх захирал Жон Ханке хариуцах юм.
Шинэ төслийн нийт санхүүжилт $250 сая ам.доллар байх бөгөөд $200 сая нь Niantic-ийн өөрийн хөрөнгөөс, харин $50 саяыг Scopely компаниас гаргах юм. Мөн Niantic-ийн анхны хөрөнгө оруулагчид шинэ компанийн хувьцаа эзэмшигчээр үлдэнэ.
Niantic-ийн тоглоомын салбараа зарах болсон шалтгаан
Niantic компанийн хувьд Pokémon GO-ийн амжилтыг давтах оролдлогууд амжилтгүй болж, 2022-2023 онд ажилчдаа цомхотгох арга хэмжээ авсан. Тус компани 2022 онд Harry Potter: Wizards Unite тоглоомоо хаасан нь тэдний тоглоомын салбар дахь хүндрэлтэй байдлыг харуулж байсан юм.
Саудын Арабын тоглоомын салбар дахь томоохон хөрөнгө оруулалт
Саудын Араб Esports World Cup зэрэг томоохон цахим спортын тэмцээн зохион байгуулж, тоглоомын салбарт хүч түрэн орж байна. Savvy Games Group тус улсын $38 тэрбум ам.долларын хөрөнгө оруулалтын төлөвлөгөөний нэг хэсэг болж, Nintendo зэрэг дэлхийн тоглоомын томоохон компаниудад хувьцаа эзэмшиж байна. Тус сан Nintendo-ийн 7.54%-ийг эзэмшдэг нь тэдний тоглоомын салбарт хэрхэн томоохон байр суурь эзлэхийг зорьж байгааг харуулж байна.
