Valve компани Их Британи дахь Steam үйлчилгээний 14 сая хэрэглэгчийн нэр дээр гаргасан нэхэмжлэлийн дагуу шүүхэд очихоор болжээ.
Reuters агентлагийн мэдээлснээр, уг хэргийг Их Британийн шүүх хэлэлцэхээр болсон байна. Хэрэв нэхэмжлэгч тал ялбал Valve компани 656 сая фунт стерлинг буюу ойролцоогоор 897.7 сая долларын нөхөн төлбөр төлөх шаардлагатай болох юм. Энэхүү нэхэмжлэлийг хүүхдийн эрхийг хамгаалагч Вики Шотболт санаачлан 2024 оны зун гаргасан байна.
Нэхэмжлэлийн үндэслэл:
- Өндөр шимтгэл: Valve компани тоглоом болон нэмэлт контентуудад 30% хүртэлх хэт өндөр шимтгэл тогтоодог.
- Платформд хүлээх: Хэрэглэгчдийг зөвхөн нэг платформд уяж, худалдаж авсан контентоо бусад үйлчилгээгээр дамжуулан ажиллуулах боломжийг хязгаарладаг.
Valve-ийн зүгээс хэргийг эрт шатанд нь хэрэгсэхгүй болгохыг хүссэн боловч Лондоны Өрсөлдөөний асуудал эрхэлсэн давж заалдах шатны шүүх хэргийг үргэлжлүүлэх шийдвэр гаргажээ. Өмнө нь Apple (App Store) болон Google (Play Store) компаниуд мөн ижил төстэй 30%-ийн шимтгэлтэй холбоотой асуудлаар Их Британид шүүхэд дуудагдаж байсан юм.
