CS2 төрлийн “BLAST Open Spring” олон улсын тэмцээн үргэлжилж байна. Монголын төлөөлөл болох “The MongolZ” баг 2025 оны гуравдугаар сарын 24-нд хэсгийн шатны тоглолтод АНУ-ын алдарт “Liquid” багтай хүч үзлээ. Энэхүү тоглолт “Twistzz” нэрээр алдаршсан Рассель Ван Далкен болон “bLitz” буюу Б.Гарьдмагнай нарын ахлагчдын тулаанаар онцлог байв. Гэсэн ч Монголын багийн тоглолт тактик, хувийн ур чадварын хувьд давамгайлсан нь илт байлаа.
Эхний тоглолт “Anubis” газрын зургаар явагдаж, “The MongolZ” 13:7 харьцаатай ялалт байгуулсан бол удаах “Ancient” тоглолтод мөн 13:8-тай давуугаар өрсөлдөгчөө буулгаж авсан юм. Энэ хожлын үр дүнд “The MongolZ” баг өнөө шөнө буюу гуравдугаар сарын 25-ны 01:30 цагт Герман улсын “G2 Esports” багтай плей-оффын эрхийн төлөө тоглохоор болоод байна.
Энэхүү тоглолтод “bLitz” рейтингээрээ бүх тоглогчдыг тэргүүлсэн бол “Senzu” нэрээр тоглодог М.Азбаярын онцгой байлдаанууд, хүнд мөчид гаргасан шийдлүүд нь олон улсын шинжээч, тайлбарлагчдын анхаарлыг татлаа. Цахим спортын нэр хүндтэй аналист Харри Ричардс (“NER0cs”) өөрийн цахим хуудсанд: “Senzu Катовице тэмцээнээс хойш гайхалтай формтой байна. Хэсгийн тоглолтуудад 1.26 рейтингтэй байгаа ч плей-оффт 0.91 болж унадаг. Хэрэв тэр цэнгэлдэхэд тоглоод сурчихвал ‘The MongolZ’ дэлхийн том тэмцээний аварга болох боломжтой” хэмээн бичжээ.
Монголын багийг фэнүүд нь плей-оффын шатанд, тэр дундаа цэнгэлдэх хүрээлэнд үзэгчдийн өмнө тоглох үед сэтгэлзүйн тогтворгүй байдалд орж, тааруу тоглодог гэж шүүмжилдэг. Гэсэн ч энэ сул тал даван туулвал тэд том амжилтад хүрнэ гэдэгт олон хүн итгэдэг.
Өнөөдрийн тоглолтын дараа “Liquid” багийн тоглогч “NAF” буюу Кейт Маркович сэтгэгдлээ хуваалцахдаа: “Заримдаа баг доторх харилцаанаас болж бид олон алдаа гаргадаг. Бид илүү тайван, нэг зүгт харж тоглох хэрэгтэй. Энэ тоглолтоос суралцах зүйл их байна. Азтай нь Counter Strike-ийн орчинд өөрийгөө дахин батлах боломж олон бий” хэмээн онцолсон юм.
Сүүлийн хоёр жил багийн бүрэлдэхүүндээ олон өөрчлөлт хийсэн “Liquid” 2022 оноос хойш дорвитой амжилт үзүүлээгүй бөгөөд тухайн үед багийн гол хүч байсан “NAF” өнөөдрийг хүртэл багтаа үлдсэн цөөн тоглогчийн нэг билээ.
