Лос Ратонес баг EMEA Masters-ийн түүхэнд шинэ дээд амжилт тогтоов
League of Legends-ийн EMEA Masters Winter 2025 тэмцээний гранд финалд Los Ratones болон Ici Japon Corp. Esport багуудын тоглолтыг давхардсан тоогоор 486 мянга гаруй үзэгч шууд дамжуулалтаар үзсэн нь тус тэмцээний түүхэнд хамгийн олон үзэгч цуглуулсан тоглолт болж, өмнөх European Masters тэмцээнүүдийн бүх рекордыг давсан байна.
Тэмцээний ийм өндөр үзэлтэд гол нөлөө үзүүлсэн нь алдарт стример Марк Роберт “Caedrel” Ламонтын үүсгэн байгуулсан Los Ratones баг байлаа. Энэхүү багийн онцлог нь тоглогч бүр өөрийн Twitch суваг дээр бэлтгэл болон тоглолтуудаа шууд дамжуулдаг тул шинэ үзэгчид олноор татагддаг.
Los Ratones баг нийт хяналтын цаг, дундаж үзэгчдийн тоогоороо бусад бүх багийг хоёр дахин давж, топ 5 хамгийн их үзсэн тоглолтоос дөрөв нь тус багийн оролцоотой болсон нь багийн нэр хүнд, анхаарлыг хэрхэн өсгөж байгааг харуулж байна.
EMEA Masters Winter 2025 тэмцээн 2025 оны гуравдугаар сарын 17-23-ны хооронд онлайнаар зохион байгуулагдаж, багууд нийт 40,000 еврогийн шагналын сантай өрсөлдсөн юм.
