HLTV портал 2025 оны CS2-ын ертөнцийн шилдэгүүдийг тодруулах Community Awards-ын ялагчдыг зарлалаа. Энэхүү шагналын эздийг платформ дээрх идэвхтэй хэрэглэгчдийн санал асуулгаар 100% тодруулсан бөгөөд 2025 оны хамгийн нөлөө бүхий дүрүүд болон үйл явдлуудыг ийнхүү нэрлэж байна.
Санал асуулга хоёр шатлалтай явагдаж, 12 дугаар сарын 31-нд дууссан бөгөөд зөвхөн 12 дугаар сарын 9-өөс өмнө бүртгүүлсэн хэрэглэгчид санал өгөх эрхтэй байжээ.
Ялагчид ба номинациуд:
Оны шилдэг авьяас (Talent of the Year) Их Британийн хөтлөгч Жеймс “BanKs” Бэнкс энэхүү шагналыг хоёр жил дараалан хүртлээ. Тэрээр нийт саналын 42.3%-ийг авч, Чад “SPUNJ” Бөрчилл (35.3%) болон Фрея Спирс (22.4%) нарыг ардаа орхисон байна.
Оны шилдэг тэмцээн (Event of the Year) Олон нийтийн зүгээс StarLadder Budapest Major-ийг оны шилдэг тэмцээнээр нэрлэв. Уг тэмцээн нь BLAST.tv Austin Major болон IEM Cologne-оос багахан хувиар илүү санал авсан бөгөөд Vitality баг түрүүлж, улирлыг гайхалтай дуусгасан билээ.
Оны шилдэг стример (Streamer of the Year) Германы алдарт стример Марк “ohnePixel” Циммерманн гурав дахь жилдээ дараалан энэхүү шагналыг хүртэж (59.3%-ийн санал), CS-ийн хамгийн нөлөө бүхий стример гэдгээ баталлаа. Хоёрдугаар байрт Эрик “fl0m” Флом, гуравдугаар байрт Вадим “Evelone192” Козаков нар шалгарчээ.
Оны шилдэг контент бүтээгч (Content Creator of the Year) Литвийн видео бүтээгч dima_aimbots өнгөрсөн жилийн ялагч NadeKing-ийг гүйцэж, энэ оны шилдэг боллоо. Гуравдугаар байрыг Шведийн кино бүтээгч Virre эзэлсэн байна.
Оны шилдэг арьс (Skin of the Year) Санал асуулгад оролцогчдын тал илүү хувь нь AWP | Printstream (зохиогч JTPNZ)-ийг оны шилдэг скинээр тодруулав. Энэхүү шагнал нь HLTV Awards-ын түүхэнд анх удаа воркшоп бүтээгчдийг үнэлж буй томоохон алхам боллоо.
