Valorant Masters Toronto 2025 тэмцээнээс өмнө Хятадын XLG Gaming багт тоглож байсан Гонконг гаралтай тамирчин Ё Вэньхао (YoU) багийг орхисон тухай албан ёсны мэдээлэл гарлаа. Тэрээр жендерийн ялгаварлал, Хятад улс руу чиглэсэн доромжлол, тоглолтын үр дүнг зохион байгуулах болон хууль бус программ хэрэглэсэн гэх шүүмжлэлд өртсөн байна.
Албан ёсны мэдэгдэл
Клубын Weibo хуудсанд дараах мэдэгдэл нийтлэгджээ:
“Өчигдөр орой тоглогчдын ёс зүйгүй үг хэллэг болон үйлдлийн талаар олон нийтийн шүүмжлэл гарсантай холбогдуулан клуб маш их анхаарч, тэр даруй дотоод мөрдөн шалгалт эхлүүлсэн. Үүнд тоглогчдоос холбогдох байгууллагатай бүрэн хамтран ажиллахыг шаардаж байна. Яаралтай хуралдааны үр дүнд YoU (Ё Вэньхао)-г 2025 оны 5-р сарын 18-наас эхлэн бүх тэмцээнээс түдгэлзүүлж, цалингүйгээр ажлаас чөлөөлсөн болно. Мөрдөн шалгалт бүрэн дуусах хүртэл түүнтэй хамтран ажиллахгүй.”
Тамирчны хариу мэдэгдэл
YoU өөрийн Weibo хуудсаар дамжуулан дараах байдлаар тайлбар хийжээ:
“Өсөлтийн шатны тэмцээнээс эхлээд өнөөг хүртэл намайг дэмжиж байсан клубын хамт олонд баярлалаа. Та бүхнийг уучлаарай, би алдаа гаргасан. Энэ асуудал хэтэрхий олон хүний цаг хугацаа, нөөцийг барахаас гадна XLG болон VCT China-ийн нэр хүндэд сөргөөр нөлөөлсөн. Тиймээс би хувийн шийдвэрээрээ багийг орхихоор болсон.”
Орлуулагч хэн болох нь тодорхойгүй
Тэмцээний эхлэх хугацаа улам ойртож буй энэ үед YoU-г орлох тоглогчийг XLG хараахан зарлаагүй байгаа юм. Valorant Masters Toronto 2025 тэмцээн нь XLG багийн хувьд улирлын гол тэмцээнүүдийн нэг бөгөөд тамирчны бүрэлдэхүүнд өөрчлөлт орсон нь багийн амжилтад хэрхэн нөлөөлөхийг харах үлдлээ.
