Nintendo-nun növbəti nəsil oyun konsolu olan Switch 2-nin ilkin icmalları artıq oyun mediasında dərc olunub. İlk testlər konsolun həm üstünlüklərini, həm də mübahisəli cəhətlərini ortaya qoyub. Jurnalistlərin fikrincə, cihaz klassik dizaynı qoruyub saxlayır, lakin bir qədər böyüyüb — yeni ekran 7.9 düym, 1080p təsvir ölçüsündədir.
OLED əvəzinə LCD panel istifadə olunmasına baxmayaraq, görüntü parlaq və canlı qalır. Portativ rejimdə 120 FPS dəstəyi isə oyun təcrübəsini daha axıcı edir. Yeni maqnitli Joy-Con-lar bərkidildikdə daha möhkəm oturur və əlavə edilən “siçan rejimi” xüsusilə Metroid Prime 4 kimi şuter oyunlarında nişan almağı xeyli asanlaşdırır.
Texniki güc: NVIDIA dəstəyi ilə sıçrayış
Yeni konsolun əsas prosessoru NVIDIA-nın ray tracing və tensor nüvəli çipi ilə təchiz olunub. Bu yenilik sayəsində Cyberpunk 2077 kimi ağır qrafikalı oyunlar orta ayarlarda problemsiz işləyir. Nintendo rəsmilərinin sözlərinə görə, GPU performansı əvvəlki modeldən 10 dəfə güclüdür. Lakin istifadəçilər üçün əsas məsələ bu deyil, 4K/120 FPS dəstəyi və portativ rejimdə sabit performans daha önəmlidir.
Start oyun kataloqu:
Switch 2 46 oyunla bazara daxil olur. Buraya həm yenilənmiş klassiklər, həm də multiplatform layihələr daxildir:
• Mario Kart World
• Donkey Kong Bananza
• Street Fighter 6
• Civilization 7
Qiymət və narazılıqlar:
Ekspertlər konsolu “gözlənilən təkmilləşdirmə” adlandırsalar da, istifadəçilərin fikri fərqlidir. Treehouse: Live təqdimatından sonra sosial şəbəkələr 450 dollarlıq qiyməti tənqid edən mesajlarla dolub. Fiziki oyunların 90 dollaradək qiyməti də narazılıqları artırır.
Ticarət siyasəti və maliyyə riskləri
ABŞ-da Tramp administrasiyası tərəfindən planlaşdırılan yeni gömrük rüsumları Switch 2-nin qiymətini daha da artıra bilər. Bunun fonunda Nintendo-nun səhm dəyərləri azalıb. Analitiklər bu vəziyyəti 2011-ci ildə 3DS konsolunun fiaskosuna bənzədir. Həmin vaxt da şirkət qiymətləri ciddi şəkildə endirməli olmuşdu.
Nəticə:
Switch 2 texniki və funksional baxımdan Nintendo fanatları üçün cəlbedici görünür. Ancaq geniş auditoriyaya yönəlmək üçün daha əlçatan qiymət, parlaq eksklüzivlər və açıq yeniliklər tələb olunur. Konsolun 5 iyun tarixində satışa çıxması bu balansın əldə olunub-olunmadığını göstərəcək.
