Антонио “MartinezSa” Мартинес ESL Pro League Season 22 тэмцээний үеэр The MongolZ багт хандсан арьс өнгөөр ялгаварласан үг хэлснийхээ дараа олон нийтээс уучлалт гуйлаа.
“Миний хэлсэн зүйл бүрэн тохиромжгүй байсан. Энэ үг хэчнээн доромж, шархлуулж болохыг одоо би бүрэн ойлгож байна,” гэж MartinezSa 10-р сарын 7-нд X (хуучнаар Twitter)-д бичжээ.
Маргаан үүсгэсэн үйл явдал
Gentle Mates болон The MongolZ багуудын тоглолтын үеэр MartinezSa камерын бичлэгт “Jackie Chan” гэж хэлж буй нь сонсогдсон. Энэ үг нь Гонконгийн жүжигчин, тулаант урлагийн мастер Жэки Чаны нэрийг дурдсан бөгөөд олон киберспорт сонирхогчид үүнийг арьс өнгөөр ялгаварласан хандлага гэж үзэн шүүмжилсэн. Уг бичлэг богино хугацаанд сошиал сүлжээнд тарж, олон хүн түүний болон хамт олны хандлагыг буруутгасан юм.
Хожим The MongolZ, Gentle Mates багийг тэмцээнээс хассан билээ.
MartinezSa-ийн уучлал
Gentle Mates тэмцээнээс хасагдсаны дараа MartinezSa баг болон Counter-Strike 2-ийн олон нийтэд хандан уучлал хүссэн мэдэгдэл гаргав.
Тэрбээр хэлэхдээ:
“Миний хэлсэн зүйл хүлээн зөвшөөрөхийн аргагүй бөгөөд хүндэтгэлгүй байсан. Би өөр соёлын хүн тул зарим үг, илэрхийллүүдийн ач холбогдлыг бүрэн ухамсарлаагүй байж магадгүй. Гэхдээ энэ бол шалтаг биш.”
Тэр цааш нь:
“Би өөрийгөө боловсруулж, илүү сайн хүн байх үүрэгтэй. Би ямар ч хэлбэрийн арьс өнгөөр ялгаварлалыг эрс эсэргүүцдэг гэдгээ онцлон хэлмээр байна. Миний хэлсэн зүйл миний итгэл үнэмшил, хүн чанарыг илэрхийлэхгүй.
The MongolZ багийн тоглогчид, миний хамт олон, байгууллага болон намайг дагаж байгаа бүх хүмүүст уучлалт хүсэж байна. Клубээс авах аливаа шийтгэл, шийдвэрийг бүрэн хүлээн зөвшөөрч, хүндэтгэнэ.”
Хариу үйлдэл ба олон нийтийн байр суурь
The MongolZ “гомдол аваагүй” гэж мэдэгдсэн ч олон фенүүд MartinezSa-ийн уучлалыг хиймэл эсвэл зохиомол мэт гэж үзэж, зарим нь үүнийг AI бичсэн байж магадгүй хэмээн хошигнож байв. Харин зарим нь “энэ бол эхний сайн алхам” гэж үнэлсэн ч цаашид түүний үйлдэл үгэндээ нийцэх ёстой гэж үзжээ.
Гэсэн хэдий ч зарим фенүүд энэ асуудлыг “хэт томруулсан” хэмээн MartinezSa-г урагш алхахыг зөвлөсөн. Киберспортод trash talk буюу сөрөг үг хэллэг өрсөлдөөнийг илүү сонирхолтой болгодог ч энэ тохиолдолд хил хязгаарыг давсан гэж үзэх хүмүүс олон байлаа.
Gentle Mates клуб мөн X-д мэдэгдэл гаргаж, MartinezSa-ийн үг “хүлээн зөвшөөрөхийн аргагүй” бөгөөд “багийн үнэт зүйлстэй нийцэхгүй” гэж дурдсан. Гэсэн хэдий ч байгууллага түүнийг шийтгэх эсэх талаар тодорхой дурдаагүй байна. ESL байгууллага мөн энэ талаар ямар нэгэн албан ёсны мэдэгдэл гаргаагүй байгаа ч уг үйлдэл нь ёс зүйн дүрэм зөрчсөн гэж үзэгдэж байна.
