Candy Crush тоглоомын хөгжүүлэгч King компани их хэмжээний цомхотгол хийхээр бэлтгэж байна. Олон эх сурвалжийн мэдээлснээр, ойролцоогоор 200 ажилтныг халах бөгөөд тэдний заримыг өмнө нь өөрсдийн бүтээсэн хиймэл оюун ухааны (AI) хэрэгслүүд орлох ажээ.
Хамгийн том хохирлыг Farm Heroes Saga-гийн Лондон дахь баг амсах бололтой — багийн талыг нь цомхотгож, 50 орчим хүн ажлаасаа салах бөгөөд тэргүүн удирдлагууд ч орно.
“Бүхэл бүтэн түвшин дизайны багийг халсан — энэ баг сүүлийн саруудад түвшин хөгжүүлэлтийг хурдасгах AI хэрэгслүүдийг бүтээж байсан. Гэтэл одоо тэр хэрэгслүүд нь тэднийг өөрсдийг нь орлож байна” хэмээн нэг ажилтан хэлжээ.
Мөн бүхэл бүтэн копирайтингийн багийг халж, AI аль хэдийн тэдний ажлыг гүйцэтгэж чадна хэмээн тайлбарлажээ. Үүнээс гадна UX, наратив зохиол, хэрэглэгчийн судалгаа, төвлөрсөн албадын ажилтнууд цомхотголд өртөхөөр байгаа бөгөөд Лондон, Барселон, Стокгольм, Берлин дэх студиудыг хамарна.
“Хэрэв аливаа функц төвлөрсөн байвал — түүнийг хална, эсвэл үйлдвэрлэлийн баг руу шилжүүлнэ” гэж нэгэн эх сурвалж мэдээлэв.
Ажилтнуудын зүгээс HR-ийн асуудлуудыг ч онцолжээ — тухайлбал, идэвхтэй эсвэл сэтгэл ханамжгүй ажилтнуудыг “өөрийн хүсэлтээр” эсвэл “санамсаргүй шалтгаанаар” ажлаас чөлөөлж байгаа тохиолдлууд гарсан байна. HR албыг “эмх замбараагүй, ажилтнуудын эрх ашгийг хамгаалж чадахгүй” гэж тодорхойлжээ.
Ажлын байран дахь сэтгэл санааны уналт цомхотголын мэдэгдлээс өмнө эхэлсэн бөгөөд сүүлд хийсэн дотоод судалгаагаар сэтгэл ханамжийн түвшин түүхэндээ хамгийн бага байжээ.
“Дээд удирдлага сэтгэл санааны уур амьсгалыг сайжруулахыг хүсэж байна гэж хэлсэн ч бодит байдалд бүх зүйл үгүй болсон” хэмээн нэгэн ажилтан ярив.
Олон нийтийн өмнө King-ийн удирдлага “процессийг хялбарчилж, давхардсан удирдлагын түвшинг хасч, хэт мэргэшсэн багуудыг нэгтгэх” зорилготой гэж мэдэгдсэн байна.
“Хурал дээрх тайлбар бол яг л бэлтгэсэн текст уншихтай адил байсан — энэ бол бидний хувьд гутаан доромжлол байлаа” гэж нэг ажилтан дурджээ.
Шинэ бүтэц, зохион байгуулалтын талаар 2025 оны есдүгээр сард танилцуулах бөгөөд профсоюзтай хэлэлцээ дууссаны дараа илүү тодорхой болно гэж мэдэгдсэн. Гэвч ажилтнууд одоогоор эргэлзээтэй, тодорхой бус байдалд байгаа аж.
Microsoft болон King компаниуд одоогоор тайлбар өгөөгүй байна.
