Esports Virtual Arenas (EVA) компани “EVA Pro League”-ийг албан ёсоор эхлүүлж байгаагаа зарлалаа. Энэхүү лиг нь VR технологийг зүгээр нэг аркад тоглоомын түвшнээс гаргаж, жинхэнэ спортын тэсвэр хатуужил, орон зайн баримжаа шаардсан кибер спортын дээд түвшний төрөл болгон хөгжүүлэх зорилготой юм.
Одоогоор Европын алдартай найман байгууллага тус лигт нэгдээд байна. Үүнд: G2 Esports, Team Vitality, Team Heretics, SK Gaming, GiantX, Shifters, Solary болон OG Esports багууд багтжээ.
Тэмцээний онцлог ба формат
Лигийн тоглолтууд 4 дүгээр сарын 14-нөөс эхлэхээр төлөвлөгдөж байна. Энэхүү тэмцээн нь VR салбарт томоохон үсрэлт болох бөгөөд тоглогчид 500 м² талбай бүхий арена дээр биеэрээ чөлөөтэй хөдөлж, гүйж, дайсны суманаас бултаж тоглох юм.
- Хугацаа: 2026 оны 4 дүгээр сарын 14-нөөс 10 дүгээр сарын 25 хүртэл.
- Формат: Тойргийн журмаар (Round-robin) “гэртээ” болон “зочилж” тоглох зарчмаар явагдана.
- Тоглолтын систем: Best-of-3 (Боломжит гурван үеэс хоёр хожих).
- Технологи: EVA-ийн өөрийн технологи нь хоёр өөр байршилд байгаа багуудыг нэг виртуал орчинд нэгэн зэрэг тулалдах боломжийг олгодог.
Шагналын сан ба урамшуулал
Лигийн суурь шагналын сан 50,000 евро байх бөгөөд үүн дээр нэмэлт санхүүжилт орно. Тодруулбал, багуудын нэрэмжит тусгай “скин” (тоглоом доторх өнгө төрх)-ийг 19.99 еврогоор худалдаалах бөгөөд борлуулалтын орлогын 25 хувийг шагналын санд нэмэх ажээ.
Улирлын тоглолтуудын үр дүнгээр хамгийн өндөр оноо авсан шилдэг дөрвөн баг 10 дугаар сарын сүүлээр болох “EVA Summit” плей-оффын шатанд өрсөлдөж, аваргын төлөө тулалдана.
