Electronic Arts (EA) компанийн ажилтнууд болон United Videogame Workers-CWA Local 9433 үйлдвэрчний эвлэл компанийг хувийн хөрөнгө оруулагчидтай хийх гэрээгээ дахин бодохыг уриалсан хамтарсан мэдэгдэл гаргажээ.
Эвлэлийн мэдэгдэлд дурдсанаар, гэрээ нь EA-ийн дотоод студиуд болон олон мянган ажлын байранд аюул учруулж болзошгүй гэж ажилтнууд үзэж байна. Сүүлийн хоёр жилд EA хэд хэдэн студи хааж, олон ажилтнаа халах шийдвэрүүд гаргаж ирсэн. Компанийн удирдлага “шинэ гэрээтэй холбоотойгоор шууд цомхотгол хийхгүй” гэж мэдэгдсэн ч, ажилтнууд энэ амлалтад итгэлгүй байна.
“EA-ийн амжилт бол олон мянган хүний хөдөлмөрийн үр дүн. Гэвч дотоод студиудыг ‘ашиг багатай’ гэж үзвэл энэ үнэт бүтээлийг устгах эрсдэлтэй” гэж үйлдвэрчний эвлэл онцолжээ.
20 тэрбум долларын өр ба эрсдэл
Гэрээг санхүүжүүлэх зорилгоор Affinity Partners болон Саудын Арабын төрийн хөрөнгө оруулалтын сан (PIF)-гаас авсан 20 тэрбум долларын зээлийг хэрхэн төлөх нь тодорхойгүй байгааг ажилтнууд анхааруулсан байна.
АНУ-ын сенаторууд Элизабет Уоррен болон Ричард Блументал нар мөн энэхүү хэлэлцээрт цаг алдалгүй шалгалт хийхийг уриалжээ. Тэд Сангийн сайд болон Гадаадын хөрөнгө оруулалтын хороо (CFIUS)-ны дарга Скотт Бессент, мөн EA-ийн гүйцэтгэх захирал Эндрю Уилсон нарт албан захидал илгээсэн байна.
Тэдний хэлснээр, Саудын Арабын оролцоо нь “гадны улс төрийн нөлөө ба далд суртал ухуулгын аюул”-ыг авчирч болзошгүй гэжээ.
EA-ийн хариу
EA гэрээний талаарх цуу яриаг баталж, 2027 оны эхний улиралд хэлэлцээрийг хаахаар төлөвлөж байгаа гэдгээ мэдэгдсэн.
Electronic Arts нь 1982 оны 5-р сарын 28-нд байгуулагдсан бөгөөд Battlefield, FIFA, The Sims, Need for Speed, Dragon Age, Mass Effect, Star Wars зэрэг дэлхийд алдартай франчайзуудыг эзэмшдэг.
