Монголын цахим спортын ертөнцөд нэгэн шинэ амжилт бүртгэгдэж, “Chinggis Warriors” баг Хятадын Шанхай хотноо зохион байгуулагдсан eXTREMESLAND 2025 LAN тэмцээний Counter-Strike 2 төрөлд тэргүүн байр эзэллээ. Арванхоёрдугаар сарын 18-наас 21-ний өдрүүдэд үргэлжилсэн тус тэмцээнд манай тамирчид Азийн шилдэг багуудтай тууштай өрсөлдөж, аваргын цомыг эх орондоо авчирсан юм.
Тэмцээний туршид “Chinggis Warriors” багийн туулсан ялалтын замыг багцалбал:
- Хэсгийн шат: RAVENS багийг буулган авч, хасагдах шатны эрхээ авсан.
- Шөвгийн найм: Хятадын “Rare Atom” багийг 2-0 харьцаатай илүүрхэж ялсан.
- Шөвгийн дөрөв: Нутгийн эзэн “Change The Game” багийг 2-1 харьцаатай хожиж, финалд шалгарсан.
- Гранд финал: Шийдвэрлэх тоглолтод “JiJieHao” багийг 2-1-ээр ялж, аваргын алтан цомыг өргөсөн.
Энэхүү түүхэн ялалт нь багт 70,000 ам.долларын мөнгөн шагналыг авчирсан бөгөөд Монголын багуудын ур чадвар олон улсад хэрхэн үнэлэгдэж байгааг дахин батлав. Түүнчлэн, тус тэмцээнд хүч үзсэн Монголын “Eruption” баг гуравдугаар байрт шалгарч, 10,000 ам.долларын шагнал хүртсэн нь манай улсын цахим спортын хөгжлийг илтгэсэн томоохон үйл явдал боллоо. Манай баг тамирчдын энэхүү амжилт нь залуу тоглогчдод урам зориг өгч, дэлхийн тавцанд гарах замыг нь улам гэрэлтүүлж байна.
