Borderlands цуврал тоглоомын хөгжүүлэгч Gearbox Software хэрэглэгчдийн зүгээс урьд өмнө байгаагүй эсэргүүцлийн давалгаа-тай тулгарлаа. Тус шуугиан нь Borderlands 4 тоглоомын гаралтаас гуравхан сарын өмнө дэгдэж, цувралын өмнөх хувилбаруудыг Steam дээр сөрөг үнэлгээгээр булж эхэлсэн байна.
Юунаас үүдэлтэй вэ?
Маргааны гол шалтгаан нь хэрэглэгчийн гэрээ буюу EULA (End-User License Agreement)-д оруулсан шинэчлэлтүүд юм. Hellfire нэртэй блогер энэхүү өөрчлөлтүүдийг дэлгэн харуулсан шалгалтын бичлэг нийтэлсэн нь тоглогчдын дунд шуугиан тарьжээ.
Тус видео бичлэгт дурдсанаар:
- Шинэ EULA нь тоглогчийн хувийн мэдээлэл цуглуулах боломжийг хэт өргөтгөсөн
- Мод бүтээгчдийн үйл ажиллагаанд хориг тавих заалтууд нэмэгдсэн
- Хэрэглэгчдийг нууцаар тагнах нөхцөлтэй адил заалтууд орсон
Steam дээрх үнэлгээ уналтад орлоо
Шүүмжлэл ид өрнөж буй энэ үед тоглогчид:
- Borderlands 3 болон өмнөх хувилбаруудад сөрөг үнэлгээ өгч эхэлсэн
- Тоглоомын үнэлгээ “ихэвчлэн эерэг”-ээс “холимог” болтлоо унасан
- Тоглоомын нэрийн хажууд “тагнуул”, “хувийн мэдээлэл зөрчсөн” гэх мэт анхааруулга бүхий тайлбарууд орж иржээ
Хэрэглэгчид хөгжүүлэгч компанийн зүгээс албан ёсны мэдэгдэл хүлээж байгаа ч Gearbox Software одоогоор ямар ч тайлбар өгөөгүй байна.
Фанатууд бойкот зарлаж, петици гаргав
Зарим тоглогчид Borderlands 4-г бүрмөсөн бойкотлохоор уриалж байна. Үүний зэрэгцээ, хуучин EULA-г сэргээх шаардлагатай сайн дурын петици онлайнд үүсжээ. Тэдний зүгээс:
“Манай нийгэмлэгийн үндэс болсон мод бүтээгчдийн эрх ашгийг зөрчиж, хэрэглэгчдийн мэдээллийг нууцаар цуглуулах нөхцөл нэвтрүүлж байгаа нь хүлээн зөвшөөрөх аргагүй” гэж үзэж буйгаа илэрхийлжээ.
PR хямралын нөлөө
Тоглоомын салбарын шинжээчид энэ асуудлыг PR (олон нийттэй харилцах) ноцтой хямрал хэмээн тодорхойлж, урт хугацааны сөрөг үр дагавартай гэж дүгнэж байна. Цаашид хэрхэн шийдэгдэх нь Gearbox Software-ын албан ёсны хариу, тодруулгаас шалтгаална.
