Battlefield-ийн тэргүүн, Call of Duty-г үндэслэгч Винс Зампелла автын ослоор таалал төгслөө

Electronic Arts (EA) компанийн Гүйцэтгэх дэд ерөнхийлөгч Винс Зампелла 55 насандаа автын ослоор харамсалтайгаар амь үрэгдлээ.

NBC4 Los Angeles хэвлэлийн мэдээлснээр, эмгэнэлт явдал 2025 оны 12 дугаар сарын 21-ний Ням гарагт болжээ. АНУ-ын Лос-Анжелес хотын ойролцоо уулын замаар явж байсан түүний Ferrari автомашин замаас гарч, бетонон хаалт мөргөн шатсан байна. Машинд Винс Зампеллатай хамт өөр нэг хүн явсан бөгөөд хоёулаа ослын улмаас амь насаа алджээ.

Түүний замнал ба өв:

Винс Зампелла бол видео тоглоомын салбарын хамгийн нөлөө бүхий эрхэмүүдийн нэг байсан юм.

• 1990-ээд он: Карьераа эхлүүлж, Infinity Ward студийг удирдаж байхдаа дэлхийд алдартай Call of Duty цувралыг анхлан бүтээгчдийн нэг болсон.
• Respawn Entertainment: Тэрээр өөрийн Respawn компанийг байгуулж, Titanfall цувралын хоёр анги болон алдартай Apex Legends тоглоомыг гаргасан.
• Battlefield: Сүүлийн жилүүдэд тэрээр EA-ийн дор Battlefield франчайзыг хариуцаж байв.

Сонирхуулахад, түүний удирдлага дор гарсан Battlefield 6 тоглоом нээлтээ хийсэн даруйдаа Steam платформ дээр нэгэн зэрэг 747 мянга гаруй тоглогч цуглуулж, EA-ийн түүхэн дэх хамгийн амжилттай нээлтүүдийн нэгээр бүртгэгдээд байсан юм.