Assassin’s Creed III болон Far Cry 4 тоглоомын бүтээлч захирал Алекс Хатчинсон PC Gamer-т өгсөн ярилцлагадаа тоглоомын ассет (asset — тоглоомын дүр төрх, хөдөлгөөн, орчин бүрдүүлэгч бэлэн материалууд)-ыг дахин ашиглах асуудлаар сонирхолтой сэдэв хөнджээ.
Түүний үзэж буйгаар, тоглоомын салбар шаардлагагүй зүйлсийг дахин хийхэд асар их нөөц бололцоогоо дэмий зарцуулж байна. Хатчинсон өөрийн ажиллаж байсан Black Flag тоглоомыг жишээ болгон дурдсан бөгөөд уг тоглоомын хөдөлгөөнт анимэйшнүүдийн 80 хувийг Assassin’s Creed III-аас шууд авч ашигласан байна. Үүнтэй төстэй нөхцөл байдал Far Cry 4 болон Far Cry Primal дээр гарсан бөгөөд тоглогчид газрын зургийн ижил төстэй байдлыг анзаарч, хөгжүүлэгчдийг “залхуу” хэмээн шүүмжилж байсан юм.
“Би хамт олондоо ‘Энэ бол 40 мянган жилийн өмнөх яг тэр газар гэдгийг хүмүүст хэлчих’ гэж зөвлөж байсан. Гэвч хэн ч юу ч хэлээгүй, улмаар хүмүүс биднийг ‘залхуу хөгжүүлэгчид’ гэж шүүмжилж эхэлсэн” хэмээн тэрээр дурсжээ.
Тэрээр Yakuza цувралыг бүтээдэг Японы RGG студийн хандлагыг “гоц ухаалаг” гэж тодорхойлсон байна. Тус студийн фэнүүд танил газруудаа дахин харахыг хүлээдэг бөгөөд студи нь энэхүү хязгаарлагдмал нөөцөө франчайзынхаа нэрийн хуудас болгож чадсан юм.
“Assassin’s Creed-ийн анимэйшнүүд олон шат дамжлага дамждаг. Black Flag-д Assassin’s Creed III-ийн контентын 80 орчим хувийг дахин ашигласан. Энэ бол томоохон студиудын хувьд хэвийн үзэгдэл” гэж Хатчинсон хэлэв.
Өнөөдөр бэлэн материалыг дахин ашиглах нь ердийн зүйл болсон гэж тэрээр үзэж байна: “Бид эдгээр бэлэн материалуудыг хангалттай ашиглаж чадахгүй байна. Магадгүй ирээдүйд хэдэн сарын ажлыг хэмнэхийн тулд хиймэл оюун ухааныг туршилтын загвар гаргахад ашиглах болов уу.” Хэдий тийм ч Хатчинсон хиймэл оюун ухаанд эргэлзээтэй ханддаг бөгөөд энэ технологи тоглоом хөгжүүлэх явцыг бүрэн өөрчилнө гэж хүлээхгүй байгаагаа илэрхийлжээ.
