Румын улсын Клуж-Напока хотод зохион байгуулагдаж буй CS2-ын дэлхийн хэмжээний “PGL Cluj-Napoca 2026” тэмцээний хэсгийн шатанд нэгэн шуугиантай үр дүн гарлаа. Монгол Улсын The MongolZ баг дэлхийн шилдэг багуудын нэг болох Natus Vincere (NaVi)-г хүчирхэг тоглолтоор ялан дийлж, тэмцээний плей-оффын шатанд өрсөлдөх эрхээ албан ёсоор халаасаллаа. Энэхүү ялалт нь Монголын цахим спортын түүхэнд тодоор бичигдэх нэгэн шинэ хуудас болж байна.
Хоёр багийн тоглолт “Best of 3” буюу гурван үеийн турш тун ширүүн уур амьсгалд өрнөсөн юм. Тоглолтын явцыг газрын зураг бүрээр авч үзвэл:
- Inferno: NaVi баг өөрсдийн сонгосон талбар дээрээ тоглолтыг давамгайлж, 13:3-аар илүүрхэн цувралыг тэргүүлсэн.
- Nuke: The MongolZ баг өөрсдийн сонгосон газрын зураг дээрээ маш нягт тоглож, 13:7-оор хариу барьснаар онооны харьцааг тэнцүүлж чадсан.
- Mirage: Шийдвэрлэх сүүлчийн үед өрсөлдөөн дээд цэгтээ хүрч, Монголын залуус 13:11-ээр NaVi-г буулган авснаар 2:1-ээр цувралд ялалт байгууллаа.
Энэхүү тоглолтод The MongolZ багийн тамирчин cobrazera болон mzinho нар тус бүр 1.11 чансаатай тоглож, багаа ялалтад хөтлөхөд голлох үүргийг гүйцэтгэжээ. “Swiss System” буюу Швейцарь системээр явагдаж буй тус тэмцээний дараагийн шатанд шалгарахын тулд 2-1 гэсэн амжилттай багууд хоорондоо LAN орчинд ийнхүү өрсөлдсөн юм.
