Ubisoft компанид дотоод зөрчил дээд цэгтээ хүрч, ажилчид удирдлагуудынхаа эсрэг “бослого” гаргаад байна. Бүтцийн томоохон өөрчлөлт зарласны дараа тус компанийн уур амьсгал маш хурцадмал болсон тухай инсайдер Том Хендерсон мэдээллээ.
Удирдлагуудыг ичээсэн “нээлттэй” шүүмжлэл
Хендерсоны хэлснээр, Ubisoft-ийн ажилчид одоо сэтгэл хөдлөлөө нуухаа больж, компанийн дотоод харилцааны сувгуудаар дамжуулан топ менежментээ ил тод шүүмжилж, бодит өөрчлөлт хийхийг шаардаж эхэлжээ. Ийм том хэмжээний корпорацын хувьд ажилчид нь удирдлагуудаа ийнхүү олон нийтийн өмнө “ичээх” явдал нь маш ховор үзэгдэл юм.
“Бүтцийн өөрчлөлт болон зардлаа танах гурав дахь шатны арга хэмжээг зарласны дараа Ubisoft-ийн дотоод сувгууд удирдлагуудаа буруутгасан, өөрчлөлт нэхсэн ажилчдын зурвасаар дүүрч байна” гэж Том Хендерсон мэдэгдэв.
“Авсан дээрх сүүлчийн хадаас”
Компанид үүссэн нөхцөл байдлыг ажилчид нь дараах байдлаар дүгнэж байна:
- Авьяас чадварын алдагдал: Олон хөгжүүлэгчид үүссэн нөхцөл байдлыг Ubisoft-ийн хувьд “авсан дээрх сүүлчийн хадаас” гэж нэрлэж байгаа бөгөөд албан ёсны цомхотгол эхлэхийг хүлээлгүйгээр өөрсдөө ажлаас гарах өргөдлөө өгч эхэлжээ.
- Итгэл алдрах: Ажилчид компанийн ирээдүйд итгэл алдарч, өөр газар ажилд орох “нөөц төлөвлөгөө”-гөө хэдийнэ хэрэгжүүлж эхэлсэн байна.
- Санхүүгийн хямрал: Дотоод хямралтай зэрэгцэн Ubisoft-ийн хувьцааны үнэ сүүлийн 10 жилийн хамгийн доод түвшинд хүртлээ унажээ.
Одоогоор 2000 гаруй ажилтан цомхотголд өртөж магадгүй байгаа ч компанийн шилдэг мэргэжилтнүүд өөрсдийн хүсэлтээр бөөнөөрөө гарч байгаа нь Ubisoft-ийн хувьд цомхотголоос илүү том гарз хохирол учруулж болзошгүйг инсайдер онцолж байна.
