BLAST Slam VI тэмцээний зохион байгуулагчид Dota 2-ын энэхүү нэр хүндтэй тэмцээнд оролцох 12 багийн нэрсийг албан ёсоор зарлаж дууслаа. Хамгийн сүүлийн дөрвөн эрхийг Team Liquid, OG, Team Spirit болон GamerLegion багууд авснаар тэмцээний бүрэлдэхүүн бүрэн бүрдсэн байна.
Тэмцээний нийт оролцогчдын дунд өмнөх Slam IV тэмцээний шилдэг дөрвөн баг болох Tundra Esports, Team Falcons, MOUZ болон HEROIC багууд багтсан бол Team Yandex баг Slam V тэмцээний амжилтаараа уригджээ. Шууд урилгаар Team Liquid, OG Esports болон Team Spirit нар оролцох бол GamerLegion баг Америк бүсийн урилгаар эрхээ авсан байна. Урьдчилсан шатнаас шалгарсан багуудын хувьд Natus Vincere Европын, REKONIX Зүүн Өмнөд Азийн, харин Xtreme Gaming Хятадын урьдчилсан шатнаас тус тус эрхээ авчээ.
BLAST Slam VI тэмцээн 2026 оны 2 дүгээр сарын 3-наас 15-ны хооронд зохион байгуулагдах бөгөөд хэсгийн тоглолтууд онлайнаар явагдах бол шийдвэрлэх плей-оффын шат Мальта улсад LAN хэлбэрээр зохион байгуулагдана. Тэмцээний нийт шагналын сан 1 сая ам.доллар байх бөгөөд дэлхийн шилдэг багууд энэхүү нүсэр шагналын төлөө өрсөлдөхөөр цугларах гэж байна.
